Лошата патна инфраструктура и немањето основни услови за живот, влијаат да немаме соодветна туристичка понуда

by ugostitelstvo.mk

Последиците од коронавирусот, се гледаат не само од здравствен, туку и од економски карактер. Кризата се чувствува во цел свет, а ниту Македонија не остана имуна на последиците од пандемијата. Спасот од финансиската криза мпра да го побараме во алтернативниот туризам, посочи денеска во Скопски агол на „Утрински брифинг“ на „Слободна ТВ“, претседателот на Балканската асоцијација за алтернативен туризам, Балканија, Владо Србиновски.

Насочувањето на граѓаните кон домашниот туризам е иделен начин да се подобри состојбата во економијата. Границите се затворени, протоколите за излез од државата се строго, ретко кој ќе ја напушти државата за да оди на одмор. Затоа, можеме на граѓаните да им ги понудиме домашните сместувачки капацитети. За жал, Македонија е ориентирана кон сезонски туризам, и има недоволен број на сместувачки капацитети во однос на природните убавини кои може да се посетат. Тоа значи дека треба повеќе да работиме на создавање на сместувачки капацитети во рурални средини, со тоа што ќе се помогне да се отворат семејни бизниси, а со тоа ќе се намалат и проблемите со сиромаштија во руралните средини, вели Србиновски.

Тој посочи дека во најголема мера, незаинтересираноста да се посетат рурални средини кои имаат традиционална архитектура и чиста животна средина, се лоцира во лошата патна инфраструктура.

Лошата патна инфраструктура, но и немањето основни услови за живот, како водовод и канализација, влијае да немаме соодветна туристичка понуда. Планините се идеална туристичка дестинација, но бројот на планинарски домови е значително намален во однос на минатото. Тоа се должи на несоодветната програма за стимулирање на ваква туристичка понуда, објаснува Србиновски.

Тој дополнува дека Асоцијацијата Балканија постои десет години, период во кој се сменија две владеачки структури, но нити една не се заложи да ги подобри условите за развој на алтернативен туризам.

Одговорно можам да кажам дека пристапот на било која структура во политиката не е соодветен на потребите на туризмот. Има одредени иницијативи, но не се доволни. Имаше и кампањи за промоција на Македонија, како и субвенции за одредени таргетирани земји, кои успеаа да ја продолжат туристичката сезона, но речиси ништо не се направи за обезбедување услови за развој на алтернативниот туризам. Имаме над 4.000 археолошки локалитети кои треба да се стават во функција. Ние сугерираме дека е потребно да се оформи мало министерство за туризам, кое посериозно ќе се занимава со промоција на туризмот, рече Србиновски и ги повика граѓаните да ги посетат Малешевските планини, Маврово, Попова Шапка како и местата во Источниот регион.

СЛОБОДЕН ПЕЧАТ

Слични написи